الرئيسية > مقالات تقنية > تعرف اكثر على البرمجة بجميع انواعها ببساطة – ما هى البرمجة؟

تعرف اكثر على البرمجة بجميع انواعها ببساطة – ما هى البرمجة؟

تعرف اكثر على البرمجة بجميع انواعها ببساطة – ما هى البرمجة؟


انت دلوقتى شغال على نسخة ويندوز عارف مين الى عملها ؟؟ 
– المبرمجين
انت بتفتح الانترنت عن طريق المتصفح  سواء انترنت اكسبلورر او فير فوكس او كروم او سفارى او .. عارف مين الى انشأ المتصفح ده وعمله  ؟
– المبرمجين 
بتفتح برنامج الدون لود مانجر علشان تحمل من على الانترنت عارف مين الى عمله ؟
– المبرمجين


يبقى البرمجة دى هى عبارة عن عملية انشاء البرامج والتطبيقات المختلفة  وكتابة الاوامر البرمجية ليتم تنفيذها سواء بواسطة الكمبيوتر او الموبايل او اى جهاز اخر كالروبوت مثلا .. 🙂

والبرمجة  بتعريف ابسط هى عبارة عن أوامر وأكواد تقوم بعمل معين وتحدد الافعال التى يقوم بها البرنامج والتطبيق

تخيل الفيس بوك بدون ان يتم برمجته عارف كان هيكون شكله ثابت ومفهوش حاجه تدوس على اى حاجه مش يحصل حاجه مجرد صورة ومفيش لا رسايل ولا اشعارات ولا اخر الاخبار ولا اى حاجه خالص مجرد شكل قدامك مهما تضغط على اى حاجه مش هيحصل حاجه تضغط على ايقونة الاشعارات مش يحصل حاجه ولا هتفتح وكذلك الرسايل هيبقى زى الجماد كده بالظبط 

لكن الواقع ان الفيس بوك متبرمج انه مثلا لما تضغط على علامة الاشعارات يفتحلك الاشعارات
لما تضغط على اسم صاحبك يوديك صفحته الشخصية
لما تدوس ” اضافة صديق ” فى الفيس بيبعتله اشعاار وهكذا كل الى بيعمل العمليات دى وبيدب الروح فى الموقع هو البرمجة 🙂

طبق بقى المثال ده على اى حاجه انت تعرفها متصفح الانترنت او اى برنامج بتستخدمه

اتمنى تكون الفكرة وصلت يعنى ايه برمجة بشكل عام

طيب ايه موضوع لغات البرمجة ده ..
لغات البرمجة دى هى اللغات الى ممكن تتواصل بيها مع الكمبيوتر وتديه امر معين علشان ينفذه

مثلا لو انت مبرمج فى الفيس بوك ينفع تكتب الكود كده  :

” لو حد ضاف حد ابعت اشعار للى ضافه ”  

 هل موقع الفيس بوك هيفهم الكلام ده ؟   هل هينفذ حاجه ؟ … لا طبعا لان فى لغة معينه هو بيفهمها

لما بتتكلم مع حد صينى لازم تكلمه صينى علشان يفهم ولما تتكلم مع حد يابانى لازم تكلمه يابانى علشان يفهم .. كذلك الكمبيوتر بيفهم لغات معينه اسمها لغات البرمجة

ولو تعلمت لغة منها تقدر تتواصل مع الكمبيوتر وتديله اوامر ينفذ اى شىء انته حابه تقدر تعمل برنامج يعمل اى شىء انت عاوزه يتعمل


جميل لحد كده ؟
تمام

تعالى بقى نعرف  مجالات البرمجة  .. زى ما كلية الطب او اى كلية اخرى  فيها اقسام جراحة وقلب واسنان و.. و .. كذلك البرمجة فيها فئات 😀  وبشكل عام يمكن تقسيمها كالآتى :

أولا : برمجة برامج الكمبيوتر 
وهو مجال برمجة البرامج التى تعمل على جهاز الكمبيوتر او الابتوب مثل الفوتوشوب برامج التحميل المتصفحات مشغلات الموسيقى والفيديو الخ … المهم انها برامج تعمل على الكمبيوتر

وبنستخدم فيه لغات برمجة زى الـ C و الـ c++  و الـ C# وغيرهم …  

ثانيا : برمجة التطبيقات الخاصة بالاجهزة المحمولة كالموبايل والتابلت والساعة الذكية وغيرها 
وده مجال تقدر فيه تبرمج تطبيقات وبرامج تشتغل على الموبايلات زى الاندرويد او الايفون  زى برامج الاذان وبرامج الصور الى على الموبايلات والبرامج الى بتشوفها فى جوجل بلاى مثلا لو عندك اندرويد

وبنستخدم فيه لغات برمجة زى الجافا ولغة objectives c ولغة سويفت..

ثالثا : برمجة الويب 
وده مجال المبرمجين فيه بيتعلموا ويبرمجوا مواقع الانترنت زى ما قولنا مثال على الفيس بوك دول بقى الى بيبرمجوا حاجات بتشتغل من خلال النت زى المنتديات والمواقع زى جوجل وفيس بوك وغيرهم دول بيبقوا مبرمجين متخصصين فى الويب
وبنستخدم هنا لغات زى PHP  او ASP  او غيرهم … 


طبعا دول 3 مجالات  ولكل مجالات فى عدة لغات ممكن تستخدمها علشان تبرمج بيها 

اهم شىء تكون عرفت المعنى العام للبرمجة وايه هى وتقدر تعمل بيها ايه

بعد كده هتحدد المجال عاوز تبرمج مواقع انترنت ولا عاوز تبرمج تطبيقات موبايل ولا تطبيقات كمبيوتر  وبعد ما تختار المجال الى حابه هتبدأ تبحث وتسأل عن اللغات المتاح انك تدرسها فى المجال ده وتبرمج بيها واى سؤال او استفسار هجاوبك ان شاء الله

مقال من كتابة المبرمج :: أحمد هندى

شاهد أيضاً

iphone8-new-interface-leak

بالصور.. ظهور واجهة أول نسخة رسمية من IPhone 8

أخبار التقنية | تسريبات آيفون 8 | Apple تعلن عن الواجهة الجديدة للهاتف المنتظر في …

10 تعليقات

  1. ما هو تعريف المشغل في لغة السي وانواعه ؟

  2. والله قد ابدع الاخ احمد هندي ببساطته

  3. ما هى انواع كتب تعليم لغات البرمجه بانواعها؟

  4. موعدنا اليوم مع البرمجة البسيطة مع المبسط محمد علاء الدين 🙂
    هو الموضوع حلو بس انت مبسطها قوى يا حاج

  5. انا كنت ببحث عن “تقدر تعرف مكان صاحبك على ايفون 5”
    فجأة لقيت نفسى فى البرمجة وفى الموضوع ده هههههههههه
    فجأة بسبب الموضوع ده اتعلمت البرمجة وبقيت مبرمج
    ههههههههههههه شئ مضحك فعلا

  6. قبل قرائة هذا المقال
    كنت استصعب البرمجة وكنت متكاسل جدا فى انى اتعلمها

    بعد قرائة مقالك
    الحمد لله الذى الهمنى بك للبداية حالا فى تعلم اللغات الخاصة بالبرمجة كلها
    اوجه لك كل الشكر والتقدير
    شكرا يا استاذنا

  7. شكرا جزيلا لك على الطرح الجميل والممتاز
    هنا فى هذا الموضوع عرفت البرمجة بعدما كانت هذه الكلمة معقدة بالنسبة لى
    اشكر فيك بساطتك وجمالك الرائعين

    جزاك الله عنا كل خير

  8. بصراحة انت رائع
    اولا لآنك نقلت لنا الفائدة بدون اقتطاع
    وثانيا لأنك حفظت حقوق الكاتب رغم انه لا يحفظ حقوقه
    الف شكر لك يا استاذ محمد #ابوعلاء

ضع تعليقا مناسبا وشاركنا رأيك و لنعمل على إبقاء النقاش ودياً وحضارياً ...

%d مدونون معجبون بهذه: